好pure好true

:我認為好多人都誤會左咩係“好pure好true”

經過歷練，見盡世間醜惡，但仍然保持純潔既心，先為之真正好pure好true

果d咩未拍過拖，仲係處，唔講粗口之類...極其量只係未見過世面，未開過眼界，腦部未開發，即係好似細路女乜都唔識咁。我稱佢為無知

成日都聽（上大學都見唔少）：佢岩岩升U果時連粗口都唔講，聽到黃色笑話都會面紅，而家成個人變晒啦，學壞晒

大學又ocamp又上莊又住hall，飲酒通頂係等閒事，仲有初戀無限touch,又同唔同人分組做project,又人多口雜，又是非，又明爭暗鬥...

其實有幾壞？粗口咸野你自己唔講架？咁你自己係咪壞人？

一個sem可以“變”左第個人。與其話係變，不如話接觸個現實世界多左，個人經歷多左，心態more adapted to the reality

嚴格來講，只係發掘左自己真正一面，發現自己做人可以去到咁盡。

到左出來做野，個世界更現實，要生存，即使唔害人，都要保護自己，保護自己即係要防人，防人唔多唔少都有d壞心眼。

如果了解現實，就唔會對一個人變得“醜惡”而太驚訝，只係民智既正常發展。

如果想keep住女友無知，請你承擔晒佢人生所有憂慮，免卻佢接觸殘酷而現實既世界，留佢喺溫室，就好似爸爸保護阿女咁。

除非你有咁大能奈，否則要求一個出社會做事既女仔無知,等同要佢對險惡冇免疫力一樣咁殘忍。萬一有咩“事”發生喺佢身上，果下衝擊，果下twist到佢癲既機會好大。

如果你真心追求好pure好true既女仔，你應搵個有過去但依然簡單既女仔。因為喺你面前既佢，係一個經歷過險惡而選擇保持赤子之心既人。而非果d因未見識過世界，無知而被誤會成pure,當遇見現實而蛻變成“壞”既女人。

當然，你可以話你對pure, true既定義其實只係處女，兩性關係經驗少，或者係因為佢個腦比較empty,容易d比你控制，更加顯得你man,咁我無野講。只係覺得你太侮辱左pure同true呢兩個字，因為佢地其實好deep。